काठमाण्डाै – काभ्रेकाे धुलिखेल नगरपालिकाले नगरवासीसँग नेपाली भाषामै सीधा सम्पर्क स्थापित गर्न एआई टेलिफाेनी प्रणाली प्रयाेगमा ल्याएकाे छ ।
नागरिक र सरकारबीचको सम्बन्धलाई पुनर्परिभाषित गर्दै नगरपालिकाका महत्त्वपूर्ण सूचनाहरू जस्तै– कर तिर्ने म्याद, जन्मदर्ता सङ्कलन वा स्वास्थ्य शिविरको जानकारी सबैसम्म पुर्याउन ‘टिङ टिङ’ एआई टेलिफाेनी प्रणाली प्रयाेगमा ल्याएकाे हाे । याे प्रणालीले एकैसाथ हजाराैंलाई उनीहरूकै नाममा सम्बोधन गर्दै नेपाली भाषामा स्वचालित फोन कल गर्न सकिने नगरपालिकाले जनाएकाे छ ।
विश्व एआई प्रविधिको दौडमा अघि बढिरहेका बेला नेपालका स्थानीय सरकार पनि पछि छैनन् भन्ने उदाहरण धुलिखेल नगरपालिकाले प्रस्तुत गरेको छ । प्रणालीबारे धुलिखेल नगरपालिकाका मेयर अशोककुमार ब्यान्जु श्रेष्ठले भन्नुभयो, ‘एआईको दौडमा सरकार पहिलो हुनुपर्छ, अनि हामी शुरू गर्दैछौँ ‘टिङ टिङ’ बाट । स्थानीय सरकारले नागरिकहरूलाई दिने सेवामा संविधानले प्रदान गरेको अधिकार क्षेत्रभित्र २२ वटा अधिकारमा थुप्रै काम गर्नुपर्छ । ती थुप्रै कामहरूलाई सहज र सुलभ बनाउनका लागि धुलिखेल नगरपालिकाले डिजिटल सेवालाई प्राथमिकता दिएर काम गरिरहेको छ ।’
मेयर श्रेष्ठले ३८ हजार नगरवासीलाई गुणस्तरीय रूपमा सेवा दिनका लागि अब एआई प्रणालीबाट पनि सूचना आदानप्रदान गर्ने प्रक्रियामा अगाडि बढेकाे बताउनुभयाे । टेलिफोन र नेपाली भाषाजस्तो सबैभन्दा सरल र प्राकृतिक माध्यमबाट सूचना प्रवाह गर्दा कुनै पनि नागरिक पछाडि नपर्ने नगरपालिकाको विश्वास छ ।
धुलिखेलको यो कदमले नेपालमा डिजिटल रूपान्तरणको नेतृत्व स्थानीय तहबाटै सम्भव छ भन्ने उदाहरण प्रस्तुत गरेको छ । यसले देशका अन्य सरकारी निकायहरूलाई पनि प्रविधि अपनाएर नागरिक सेवालाई अझ प्रभावकारी र समावेशी बनाउन प्रेरित गर्ने छ ।
