काठमाडौँ । अमेरिकी राष्ट्रपति Donald Trump ले इरान र अमेरिकाबीचको संवाद बन्द भएको भन्ने समाचारहरू सत्य नभएको बताएका छन्। उनले दुवै देशबीच पछिल्ला दिनहरूमा पनि निरन्तर सम्पर्क र छलफल भइरहेको दाबी गरेका हुन्।
मंगलबार राति आफ्नो सामाजिक सञ्जाल ट्रुथ सोसलमार्फत प्रतिक्रिया दिँदै ट्रम्पले इरानसँगको वार्ता नियमित रूपमा जारी रहेको उल्लेख गरे। उनका अनुसार केही सञ्चारमाध्यममा आएको ‘वार्ता रोकिएको’ भन्ने समाचार वास्तविकतासँग मेल खाँदैन।
ट्रम्पले इरान र अमेरिकाबीच चार दिनअघिदेखि आजसम्म हरेक दिन संवाद भएको दाबी गर्दै कूटनीतिक सम्पर्क निरन्तर कायम रहेको बताएका छन्।
यसअघि लेबनानमा विकसित सुरक्षा परिस्थितिका कारण अमेरिकासँगको वार्ता स्थगित गरिएको इरानको भनाइ सार्वजनिक भएको थियो। तर पछिल्लो समय ट्रम्पको आग्रहपछि इजरायलले लेबनानमाथिका सैन्य गतिविधि नियन्त्रण गर्ने संकेत दिएको अन्तर्राष्ट्रिय सञ्चारमाध्यमहरूले जनाएका छन्।
इरान–अमेरिका सम्बन्ध र क्षेत्रीय तनावबीच आएको ट्रम्पको यो अभिव्यक्तिलाई मध्यपूर्वको कूटनीतिक अवस्थासँग जोडेर हेरिएको छ।
