काभ्रे । बनेपा बजार क्षेत्रका सडकछेउमा जथाभावी फालिएका विद्युतीय तार तथा अव्यवस्थित रूपमा फालिएका ब्यानरका कारण दैनिक आवतजावतमा जोखिम बढ्दै गएको छ। पैदलयात्री हिँड्ने बाटोसमेत अवरुद्ध हुने गरी फैलिएका तारहरूले सर्वसाधारणलाई असहज बनाइरहेको छ।
विशेषगरी साँघुरा फुटपाथ र सडक किनारमा अस्तव्यस्त रूपमा रहेका तारका गुच्छा तथा ब्यानरका डोरीमा पैदलयात्री अल्झिएर लड्ने घटना हुन सक्ने जोखिम देखिएको छ। त्यस्तै, दुई पाङ्ग्रे सवारी साधन सञ्चालनमा समेत कठिनाइ भइरहेको स्थानीयले बताएका छन्।
स्थानीयवासीका अनुसार बजार क्षेत्रको सुन्दरतासँगै सुरक्षामा पनि असर पार्ने गरी जथाभावी तार तथा ब्यानर व्यवस्थापन नभएकाले दुर्घटनाको सम्भावना दिनप्रतिदिन बढ्दै गएको छ। हावाहुरी चलेको समयमा यी सामग्री अझ बढी जोखिमपूर्ण बन्ने गरेको उनीहरूको भनाइ छ।
सडक छेउछाउमा रहेका अव्यवस्थित संरचनालाई तत्काल व्यवस्थित नगरे ठूलो दुर्घटना हुन सक्ने चेतावनी पनि स्थानीयले दिएका छन्। उनीहरूले सम्बन्धित निकायको पटक–पटक ध्यानाकर्षण गराए पनि ठोस पहल हुन नसकेको गुनासो गरेका छन्।
यस विषयमा नगरपालिकाले समयमै आवश्यक कदम चालेर तार व्यवस्थापन तथा अनावश्यक ब्यानर हटाउने काम गर्नुपर्ने स्थानीयको माग छ। सरोकारवाला निकायको समन्वयमा दीर्घकालीन समाधान खोजिनु आवश्यक देखिएको छ।
