काठमाडौं । अविरल वर्षापछि डुबानमा परेका कीर्तिपुरस्थित राधास्वामी होल्डिङ सेन्टरका सुकुमवासीलाई स्थानान्तरण गरिएको छ ।
कीर्तिपुरबाट ३१ परिवारका ८९ जनालाई खरिपाटीस्थित होल्डिङ सेन्टरमा लगिएको हो ।
सुकुमवासीहरूलाई सरकारले भक्तपुरको खरिपाटी र बोडेमा स्थानान्तरण गरेको छ।
बागमती किनारका बस्तीहरू डुबानमा पर्ने भन्दै प्रधानमन्त्री बालेन्द्र शाह (बालेन) नेतृत्वको टोलीले गत वैशाख १२ गतेदेखि बल प्रयोग गरेर थापाथली लगायतका क्षेत्रबाट सुकुमवासीहरूलाई हटाएको थियो।
सुरुमा मात्र १५ दिनका लागि भन्दै होल्डिङ सेन्टरमा राखिएका उनीहरूलाई दुई महिना बित्दासमेत उचित व्यवस्थापन नगर्दा अहिले एकपछि अर्को गम्भीर संकट आइलागेको छ।
दुई दिनअघि मध्यरातमा अचानक होल्डिङ सेन्टरभित्र बाढी पसेपछि सुकुमवासीहरूका प्रायः सबै भौतिक सामग्री, घरायसी सामान, लत्ताकपडा र अत्यावश्यक वस्तुहरू भिजेर पूर्ण रूपमा नष्ट भएका छन्।
अचानक बाढी पसेका कारण धेरैले आफ्नो सामान सुरक्षित स्थानमा निकाल्ने मौका नै पाएनन्, जसले गर्दा उनीहरू अहिले एक सरो लुगाको भरमा मात्र बाँच्न बाध्य भएका छन्। होल्डिङ सेन्टर पूरै डुबानमा परिसकेपछि मात्र सुरक्षाकर्मीहरू उद्धारका लागि पुगेका थिए र उनीहरूले सुकुमवासीहरूलाई डुङ्गाको सहायताले सुरक्षित बाहिर निकालेका थिए।
सुरक्षा निकायका अनुसार होल्डिङ सेन्टरमा रहेका कुल १५४ जनामध्ये ५४ जनाको उद्धार गरी तत्कालका लागि त्रिभुवन विश्वविद्यालयस्थित स्मृति भवनमा सुरक्षित रूपमा स्थानान्तरण गरिएको थियो। त्यस्तै अन्य ६ जना आफ्ना आफन्त वा नजिकैको होस्टलमा बस्न गएका थिए भने बाँकी ९४ जनाले सुरुमा अन्यत्र जान मानेका थिएनन्।
