काठमाडौं । रसुवाको भोटेकोशी नदीमा आएको बाढीपछि जोखिममा परेका तथा घाइते नागरिकको उद्धारका लागि नेपाली सेना र निजी क्षेत्रका हेलिकप्टर परिचालन गरिने भएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणको बैठकले प्रभावित क्षेत्रबाट घाइतेलाई तत्काल सुरक्षित स्थानमा ल्याएर उपचारको व्यवस्था मिलाउने निर्णय गरेको हो ।
गृह मन्त्रालयका प्रवक्ता आनन्द काफ्लेका अनुसार उद्धार गरिएका घाइतेलाई प्रारम्भिक उपचारका लागि रसुवाको धुन्चे र नुवाकोटको विदुरस्थित नेपाली सेनाको ब्यारेकमा तयार गरिएका अस्थायी शिविरमा लगिनेछ ।
गम्भीर प्रकृतिका घाइतेलाई भने थप उपचारका लागि हेलिकप्टरबाट काठमाडौं ल्याउने तयारी गरिएको छ । घाइतेको अवस्था मूल्याङ्कन गरी प्राथमिकता निर्धारण गरेर उद्धार तथा उपचारको प्रक्रिया अघि बढाइने मन्त्रालयले जनाएको छ ।
यसैबीच, बाढी प्रभावित नागरिकका लागि आवश्यक खाद्यान्न, औषधि तथा अन्य राहत सामग्री पठाउने काम पनि सुरु भएको छ । राहत सामग्री स्थलमार्गबाट नुवाकोटको विदुरस्थित नेपाली सेनाको ब्यारेकतर्फ पठाउन थालिएको बताइएको छ ।
उद्धारसँगै प्रभावित क्षेत्रमा राहत र उपचार सेवा सहज रूपमा पुर्याउने गरी सरकारी निकायले आवश्यक समन्वय गरिरहेको जनाइएको छ ।
