काठमाडौँ । बिहीबारदेखि जारी अविरल वर्षाका कारण देशका विभिन्न स्थानमा नेपाल टेलिकमको मोबाइल तथा इन्टरनेट सेवा प्रभावित भएको छ ।
नेपाल टेलिकमले सूचना जारी गर्दै वर्षा, हावाहुरी, बाढीपहिरो तथा विद्युत् आपूर्तिमा आएको समस्याका कारण कतिपय स्थानमा टेलिफोन र इन्टरनेट सेवा अवरुद्ध भएको जनाएको छ ।
टेलिकमका प्रवक्ता डा. कमल लामिछानेका अनुसार समस्या कुनै एक क्षेत्रमा मात्र सीमित नभई देशका विभिन्न स्थानमा छरिएको छ । कतिपय ठाउँमा सेवा उपलब्ध भए पनि गुणस्तरमा कमी आएको उनले बताए । उनका अनुसार निरन्तरको वर्षा र हावाहुरीका कारण विद्युत् आपूर्ति अवरुद्ध हुँदा मोबाइल टावर सञ्चालनमा समस्या आएको छ ।
पहाडी तथा हिमाली क्षेत्रमा सोलारबाट सञ्चालन हुने टावरहरूमा समेत लगातारको वर्षा, बाक्लो बादल र हिमपातका कारण ब्याट्री चार्ज हुन नसक्दा सेवा प्रभावित भएको छ । त्यस्तै, बाढीपहिरोका कारण अप्टिकल फाइबरमा क्षति पुग्दा कतिपय स्थानमा इन्टरनेट सेवा प्रभावित भएको टेलिकमले जनाएको छ । पहिरोका कारण सडक अवरुद्ध हुँदा प्राविधिक टोली प्रभावित क्षेत्रमा पुग्न नसक्दा पनि मर्मतमा कठिनाइ भइरहेको छ ।
डेटाभन्दा भ्वाइस सेवालाई प्राथमिकता विद्युत् आपूर्ति नभएका तथा ब्याकअप पावरमा सञ्चालन भइरहेका साइटमा डेटा सेवा कम गरी भ्वाइस कललाई प्राथमिकता दिइएको प्रवक्ता लामिछानेले बताए । उनका अनुसार कम्तीमा एउटा सेवा भए पनि निरन्तर राख्ने उद्देश्यले ब्याकअप पावर भएका स्थानमा डेटा सेवा घटाएर भ्वाइस सेवा सञ्चालन गर्ने प्रयास भइरहेको छ ।
टेलिकमका प्राविधिक टोलीले जोखिम कम भएका स्थानमा बिहानैदेखि मर्मतसम्भारको काम गरिरहेका छन् । सिस्टमबाट गर्न सकिने प्राविधिक सुधारको कामसमेत निरन्तर भइरहेको कम्पनीले जनाएको छ ।
