काठमाडौं । राष्ट्रिय मानव अधिकार आयोगले पूर्वप्रधानन्यायाधीश चोलेन्द्रशमशेर जबरालाई प्रहरीले नियन्त्रणमा लिएको तथा हिरासतमा रहेका बेला आयोगको टोलीलाई भेट्न नदिएको विषयमा अनुसन्धान अघि बढाएको छ ।
आयोगले पहिलो चरणमा काठमाडौं उपत्यका अपराध अनुसन्धान कार्यालय, टेकुका प्रमुख प्रहरी वरिष्ठ उपरीक्षक (एसएसपी) सन्तोष खड्कालाई बयानका लागि बोलाएको हो ।
आयोगका प्रवक्ता डा. टीकाराम पोखरेलका अनुसार खड्का मंगलबार आयोगमा उपस्थित भएका छन् । उनीसँग जबरालाई नियन्त्रणमा लिएको घटना तथा आयोगको अनुगमन टोलीलाई जबरासँग भेट्न नदिइएको विषयमा सोधपुछ भइरहेको छ ।
आयोगको टोली जबरालाई भेट्न टेकुस्थित प्रहरी कार्यालय पुगे पनि करिब ४५ मिनेट गेटमै बसेर फर्किनुपरेको थियो । प्रहरीले जबरालाई ‘सुरक्षा थ्रेट’ रहेको भन्दै नियन्त्रणमा लिएर कार्यालयमा राखेको बताएको थियो। पछि उनलाई परिवारको जिम्मा लगाइएको थियो । आयोगले घटनालाई दुई पाटोबाट अनुसन्धान गरिरहेको जनाएको छ ।
पहिलो, जबरालाई नियन्त्रणमा लिने निर्णय र त्यसको प्रक्रिया तथा दोस्रो, हिरासतमा रहेका जबराको अनुगमन गर्न पुगेको आयोगको टोलीलाई भेटघाट गर्न रोकिएको विषयमा अनुसन्धान भइरहेको छ । एसएसपी खड्कासँगको बयानपछि घटनासँग सम्बन्धित अन्य उच्च प्रहरी अधिकारी तथा सरकारी अधिकारीसँग समेत आवश्यक सोधपुछ गर्ने तयारी रहेको जनाइएको ।
आयोगले यसअघि नै आफ्नो संवैधानिक तथा कानुनी अधिकारको सम्मान गर्न आग्रह गर्दै घटनाप्रति आपत्ति जनाएको थियो ।
