दमौली । गत असोज ९, १० र ११ गते आएको अविरल वर्षा र कालीगण्डकी नदीको भीषण बाढीका कारण तनहुँ र नवलपुर जोड्ने झोलुङ्गे पुल क्षतिग्रस्त भएपछि स्थानीयको आवतजावत पूर्ण रूपमा ठप्प भएको छ ।
बाढीले तनहुँको घिरिङ गाउँपालिका–४ करूवाटार मौतिघाट र नवलपुरको बौदीकाली गाउँपालिका–१ मचेडी जोड्ने पुलमा गम्भीर क्षति पुर्याएको हो ।
पुल अवरुद्ध भएसँगै करूवाटार र बटौलिटारलगायतका क्षेत्रका बासिन्दालाई नदी वारपार गर्न समस्या भएको छ ।
विद्यार्थीहरू विद्यालय जानबाट वञ्चित
पुलमा पुगेको क्षतिका कारण सबैभन्दा ठूलो मारमा विद्यालय जाने बालबालिका परेका छन् ।
पुलमा पुगेको क्षतिका कारण सबैभन्दा ठूलो मारमा विद्यालय जाने बालबालिका परेका छन् ।
करूवाटार र बटौलिटार क्षेत्रबाट नदीपारि रहेको बौदीकाली–१ मचेडीस्थित धर्मात्मा माध्यमिक विद्यालयमा अध्ययन गर्न जाने करिब १५-२० जना विद्यार्थीहरू नियमित विद्यालय जान पाएका छैनन् ।
कालीगण्डकी नदीमा अहिले पनि पानीको बहाव उच्च र जोखिमपूर्ण रहेकाले वैकल्पिक माध्यमबाट समेत नदी तर्न सक्ने अवस्था नरहेको घिरिङ गाउँपालिका–४ का वडाध्यक्ष भीमबहादुर कुमालले जानकारी दिनुभयो ।
हाल स्थानीय प्रशासन तथा जनप्रतिनिधिहरूले क्षतिग्रस्त भौतिक संरचनाहरूको निरीक्षण गरी आवतजावतलाई पुनः सुचारु गर्न आवश्यक समन्वय गरिरहेका छन् ।
