नुवाकोटको शिवपुरी क्षेत्रमा बिहीबार साँझ भएको सवारी दुर्घटनामा एक जनाको मृत्यु भएको छ भने दुई जना घाइते भएका छन् । घाइतेहरूको काठमाडौँमा उपचार भइरहेको प्रहरीले जनाएको छ ।
छहरे–टोखा सडकखण्डअन्तर्गत शिवपुरी गाउँपालिका–६ गुर्जेभञ्ज्याङ नजिकै काठमाडौँतर्फ जाँदै गरेको बिएई ०५६९ नम्बरको विद्युतीय कार अनियन्त्रित भई सडकबाट करिब १५० मिटर तल भीरमा खसेको थियो ।
दुर्घटनामा गम्भीर घाइते भएका सिराहा सुखीपुर नगरपालिका–२ निवासी ३५ वर्षीय सञ्जीवकुमार चौधरीलाई उपचारका लागि काठमाडौँको ग्राण्डी अस्पताल लगिएको थियो । तर अस्पताल पुगेलगत्तै चिकित्सकले उनलाई मृत घोषणा गरेका थिए । प्रहरीले साथमा रहेको सवारी चालक अनुमति पत्रका आधारमा उनको पहिचान गरेको जनाएको छ ।
घटनामा सुनसरी इनरुवा नगरपालिका–५ का ४० वर्षीय उत्सव पोखरेल र काठमाडौँ महानगरपालिका–९ गौरीघाटका ४४ वर्षीय लोकेश मिश्र घाइते भएका छन् । उनीहरूको ग्राण्डी अस्पतालमा उपचार भइरहेको जिल्ला प्रहरी कार्यालय नुवाकोटले जनाएको छ ।
जिल्ला ट्राफिक प्रहरी कार्यालय नुवाकोटका अनुसार दुर्घटना भएको स्थान जङ्गल क्षेत्र तथा अँध्यारो भएकाले उद्धार कार्य चुनौतीपूर्ण बनेको थियो । स्थानीयवासी र प्रहरीको संयुक्त प्रयासमा घाइतेहरूको शीघ्र उद्धार गरी काठमाडौँ पठाइएको बताइएको छ ।
प्रहरीले दुर्घटनाको कारणबारे थप अनुसन्धान भइरहेको जनाएको छ ।
