काभ्रे । काभ्रेपलाञ्चोकको नमोबुद्ध नगरपालिका–२ बुच्चाकोट क्षेत्रमा शुक्रबार यात्रुवाहक बस दुर्घटना हुँदा कम्तीमा सात जनाको मृत्यु भएको प्रारम्भिक जानकारी प्राप्त भएको छ।
बनेपाबाट रोशी गाउँपालिकाको सुँगुरेतर्फ जाँदै गरेको बा ३ ख ८३९८ नम्बरको बस अनियन्त्रित भई सडकबाट दुर्घटनामा परेको हो। दुर्घटनामा सात जनाले घटनास्थलमै ज्यान गुमाएको प्रारम्भिक विवरण सार्वजनिक भएको छ।
दुर्घटनापछि स्थानीयवासी, प्रहरी तथा उद्धारकर्मी घटनास्थलमा परिचालित भएका छन्। घाइतेहरूको उद्धार गरी नजिकका स्वास्थ्य संस्थामा पठाउने काम भइरहेको बताइएको छ। दुर्घटनाको कारण भने तत्काल खुल्न सकेको छैन।
मृतक तथा घाइतेहरूको पहिचान गर्ने काम जारी रहेको प्रहरीले जनाएको छ। घटनाबारे थप विवरण आउन बाँकी रहेको र आधिकारिक तथ्याङ्क प्राप्त भएपछि जानकारी अद्यावधिक गरिने जनाइएको छ।
दुर्घटनाप्रति स्थानीयवासीले दुःख व्यक्त गर्दै पीडित परिवारप्रति समवेदना प्रकट गरेका छन्।
