काठमाडौं । राष्ट्रिय स्वतन्त्र पार्टी (रास्वपा)को सचिवालय बैठक आज पार्टी केन्द्रीय कार्यालय वनस्थलीमा जारी रहेको छ । पार्टीको संगठनात्मक संरचना, आगामी महाधिवेशनको तयारी तथा नीतिगत विषयहरूमा केन्द्रित रहेर बैठक अघि बढिरहेको बताइएको छ ।
बैठकमा मुख्य रूपमा आउँदो महाधिवेशनलाई व्यवस्थित बनाउन आवश्यक तयारी, पार्टी विधानमा गर्नुपर्ने संशोधन तथा महाधिवेशन कार्यविधिसम्बन्धी विषयमा छलफल भइरहेको पार्टी स्रोतले जनाएको छ ।
रास्वपाले असार ७ देखि ९ गतेसम्म चितवनमा पहिलो महाधिवेशन गर्ने तयारी गरिरहेको छ । सो महाधिवेशनलाई सफल बनाउन आवश्यक निर्णय तथा कार्ययोजना सचिवालय बैठकमार्फत अन्तिम रूप दिने तयारी गरिएको छ ।
पार्टीले संगठन सुदृढीकरणसँगै आगामी राजनीतिक रणनीति र आन्तरिक संरचनालाई थप स्पष्ट बनाउने उद्देश्यले छलफललाई प्राथमिकतामा राखेको बताइएको छ ।
