कञ्चनपुर । कञ्चनपुरस्थित एक होटलमा आयोजित सार्वजनिक कार्यक्रममा वडाध्यक्षमाथि हातपात भएको घटनापछि पत्रकार ऐश्वर्या कुँवर पक्राउ परेकी छन् । उनी आभासडटकमकी अध्यक्ष तथा कार्यकारी सम्पादक पनि हुन् ।
भीमदत्त नगरपालिका–१८ का वडाध्यक्ष रविन्द्र देवकोटामाथि कार्यक्रमकै क्रममा मुक्का प्रहार भएको भिडियो सार्वजनिक भएपछि घटना विवादमा तानिएको हो । सोही भिडियो सामाजिक सञ्जालमा व्यापक रूपमा फैलिएको छ, जसमा कुँवरले वडाध्यक्षमाथि हातपात गरेको दृश्य देखिन्छ ।
प्रहरीका अनुसार घटनाबारे उजुरी परेपछि उनलाई नियन्त्रणमा लिइएको हो । जिल्ला प्रहरी कार्यालय कञ्चनपुरका प्रवक्ता डीएसपी टेकबहादुर रावतले घटनाको प्रारम्भिक अनुसन्धानका लागि कुँवरलाई पक्राउ गरिएको जानकारी दिएका छन् ।
वडाध्यक्ष देवकोटाले कुँवरविरुद्ध अभद्र व्यवहारसम्बन्धी किटानी जाहेरी दिएका छन् । सोही आधारमा मुद्दा दर्ता गरी अदालतबाट म्याद थप गर्ने प्रक्रिया अघि बढाइएको प्रहरीले जनाएको छ ।
घटनाको कारण र पृष्ठभूमिबारे थप अनुसन्धान भइरहेको जिल्ला प्रहरी कार्यालयले जनाएको छ ।
