जनकपुरधाम । सिरहाको गोलबजारमा प्रदर्शनका क्रममा गोली लागेर ज्यान गुमाएका गणेश यादवको परिवारलाई मधेश प्रदेश सरकारले पक्की घर निर्माण गरिदिने भएको छ ।
प्रदेशका शिक्षा तथा संस्कृतिमन्त्री मनोजकुमार सिंह र यादवका परिवारबीच शुक्रबार साँझ भएको छलफलपछि घर निर्माण गर्ने सहमति भएको हो । सहमतिअनुसार यादवको परिवारका लागि दुईवटा कोठा, भान्साघर र शौचालयसहितको पक्की आवास निर्माण गरिनेछ ।
प्रदेश सरकारले सञ्चालन गर्दै आएको ‘विपन्नसँग मदन भण्डारी आवास योजना’ अन्तर्गत उक्त घर निर्माण गर्ने सहमति भएको जनाइएको छ ।
सुनसरीको देवानगञ्जमा भएको घटनालाई लिएर सिरहाको गोलबजारमा साउन १४ गते प्रदर्शन भएको थियो । सोही क्रममा गोली लाग्दा यादवको मृत्यु भएको थियो ।
यादवको परिवारको आर्थिक अवस्था कमजोर रहेको जानकारी पाएपछि प्रदेश सरकारको तर्फबाट आवास निर्माणको पहल गरिएको मन्त्री सिंहले बताएका छन् ।
