काठमाडौं । भोटेकोशी नदीमा आएको बाढीका कारण विभिन्न जलविद्युत आयोजनामा क्षति पुगेर ४३० मेगावाट विद्युत राष्ट्रिय प्रसारण प्रणालीबाट बाहिरिएपछि सरकारले वैकल्पिक विद्युत व्यवस्थापनको तयारी थालेको छ ।
बाढीका कारण त्रिशूली करिडोरबाट काठमाडौंको बालाजु र चपली क्षेत्रमा आउने विद्युत आपूर्ति अवरुद्ध भएको छ । यसले ती प्रसारण लाइनमा चाप बढेपछि वैकल्पिक आपूर्ति प्रणाली विकास गर्ने तयारी अघि बढाइएको हो ।
ऊर्जा, जलस्रोत तथा सिँचाइ मन्त्रालयको समन्वयमा नेपाल विद्युत प्राधिकरणले टास्क फोर्स बनाएर वैकल्पिक व्यवस्थापनको काम गरिरहेको मन्त्रालयका प्रवक्ता मोहनकुमार शाक्यले जानकारी दिए ।
मन्त्रालयले मंगलबार सडक विभाग र काठमाडौं महानगरपालिकासँग थप भूमिगत विद्युत ग्रिड निर्माण तथा हिउँदमा विद्युत व्यवस्थापन गर्ने विषयमा छलफल गरेको छ । भूमिगत ग्रिडलाई थप व्यवस्थित र विश्वसनीय बनाउने तयारी गरिएको छ ।
काठमाडौं उपत्यकाभित्र विशेषगरी बालाजु, चपलीलगायत क्षेत्रमा विद्युत आपूर्ति व्यवस्थापनलाई ध्यानमा राखेर वैकल्पिक प्रणाली विकास गर्ने तयारी भइरहेको छ ।
हिउँदमा विद्युतको माग बढ्ने भएकाले अहिले नै वैकल्पिक आपूर्ति व्यवस्था बलियो बनाउने उद्देश्यले काम अघि बढाइएको हो । सडक विभाग, काठमाडौं महानगरपालिका र विद्युत प्राधिकरणबीच भूमिगत तार व्यवस्थापनमा सहकार्य गर्ने सहमति भएको छ।
सडक विभागले भूमिगत ग्रिड निर्माणमा आवश्यक सहयोग गर्ने तथा काठमाडौं महानगरपालिकाले फुटपाथभित्र भूमिगत तार व्यवस्थापनमा सहकार्य गर्ने जनाएको छ । प्राधिकरणले पनि उपत्यकामा भइरहेको भूमिगत तार व्यवस्थापनलाई थप व्यवस्थित गर्दै हिउँदे विद्युत माग व्यवस्थापनमा आवश्यक काम अघि बढाउने जनाएको छ ।
