काठमाडौँ । नेपालको धितोपत्र बजारमा लगानीकर्ताको सहभागिता उल्लेख्य रूपमा बढेको छ ।
नेपाल धितोपत्र बोर्डका अध्यक्ष डा. गोपालप्रसाद भट्टले सङ्घीय संसद्को अर्थ समितिमा प्रस्तुत गरेको तथ्याङ्कअनुसार डिम्याट खाता खोल्नेको सङ्ख्या ८० लाख ९५ हजार पुगेको छ ।
बुधबार बसेको अर्थ समितिको बैठकमा अध्यक्ष भट्टले हालसम्म ५१ लाख २२ हजारभन्दा बढी ‘मेरो सेयर’ खाता सक्रिय रहेको जानकारी दिए । उनका अनुसार गत आर्थिक वर्षको असार मसान्तसम्म कारोबार खाता खोल्ने लगानीकर्ताको सङ्ख्या ३५ लाख ६२ हजारभन्दा बढी पुगेको छ ।
बोर्डका अनुसार नेपालको पुँजी बजारमा साधारण सेयरको हिस्सा सबैभन्दा बढी छ । सङ्गठित संस्थाले सङ्कलन गरेको कुल पुँजीमध्ये साधारण सेयरको हिस्सा ४६.२६ प्रतिशत रहेको छ ।
त्यस्तै, संस्थागत ऋणपत्रको हिस्सा ३१.०३ प्रतिशत, सामूहिक लगानी कोषको १४.८१ प्रतिशत, विशिष्टीकृत लगानी कोषको ५.१७ प्रतिशत र अग्राधिकार सेयरको हिस्सा २.१७ प्रतिशत रहेको बोर्डले जनाएको छ ।
