काठमाडौं । गृहमन्त्री सुधन गुरुङ असोज २६ गते भारतको नयाँ दिल्ली जाने भएका छन् ।
मन्त्री बनेपछि उनको यो पहिलो विदेश भ्रमण हुनेछ । गुरुङ बिम्स्टेक गृहमन्त्रीस्तरीय पहिलो बैठकमा सहभागी हुन भारत जान लागेका हुन् ।
बैठक असोज २७ गते नयाँ दिल्लीमा हुनेछ । बैठकमा नेपालसहित भारत, भुटान, बंगलादेश, श्रीलंका, म्यानमार र थाइल्यान्डका गृहमन्त्री सहभागी हुनेछन् ।
बैठकमा आतंकवाद तथा अन्तरदेशीय अपराध नियन्त्रणलगायत क्षेत्रीय सुरक्षा सहकार्यका विषयमा छलफल हुने जनाइएको छ ।
भ्रमणका क्रममा गुरुङले भारतीय गृहमन्त्री अमित शाहसँग द्विपक्षीय भेटवार्ता गर्ने तयारीसमेत रहेको छ ।
गृहमन्त्री गुरुङ असोज २८ गते स्वदेश फर्किने कार्यक्रम रहेको छ ।
