काठमाडौं । नेपाली कांग्रेसभित्र १५औँ महाधिवेशनलाई लिएर संस्थापन पक्ष र पूर्व सभापति शेरबहादुर देउवा पक्षबीच समानान्तर संगठनात्मक गतिविधि तीव्र बनेको छ ।
गगन थापा नेतृत्वको पक्षले अघि बढाएको महाधिवेशन प्रक्रियामा सहभागी नभई देउवा पक्षले वडा तहदेखि नै छुट्टै अधिवेशन प्रक्रिया अघि बढाएको हो ।
देउवा पक्षले सर्वोच्च अदालतमा पार्टीको आधिकारिकतासम्बन्धी विवाद पुनरवलोकनको प्रक्रियामा रहेकाले आफ्नो दाबी कायम रहेको बताउँदै समानान्तर महाधिवेशनको तयारी अघि बढाएको छ ।
उक्त पक्षले वडा, पालिका, प्रदेश तथा क्षेत्रीय, जिल्ला र प्रदेश अधिवेशन हुँदै मंसिर २१ देखि २३ गतेसम्म काठमाडौंमा केन्द्रीय महाधिवेशन गर्ने कार्यतालिका अघि सारेको छ ।
यसैबीच, देउवा आफू निकट नेताहरूसँग अदालतको फैसला आफ्नो पक्षमा आउनेमा विश्वस्त रहेको बताइएको छ। उनी निकट एक नेताका अनुसार देउवा सर्वोच्च अदालतको फैसला आफ्नै पक्षमा आउनेमा ढुक्क छन् ।
यता गगन थापा नेतृत्वको पक्षले भने आफ्नो महाधिवेशन प्रक्रिया अघि बढाइ रहेको छ । यसरी एउटै पार्टीभित्र दुई पक्षबाट समानान्तर महाधिवेशन प्रक्रिया अघि बढे पछि कांग्रेसको वैधानिकता र आगामी नेतृत्वलाई लिएर विवाद थप चर्किएको छ ।
