आज सेयरबजारमा वृद्धि देखिन थालेको छ । ५ लाखभन्दा बढीको प्रति कारोबारमा स्थायी लेखा नम्बर (प्यान) लागे पनि आजको कारोबार रकम र सूचक दुबैमा तिब्र वृद्धि आएको छ । आर्थिक वर्ष २०७५/७६ को अन्तिम प्रहर शुरु भएको छ । तेस्रो त्रैमासिक वित्तीय प्रकाशन हुने सँघारमा आइपुगेको बेला बजारमा वृद्धि देखिएको छ ।
बैशाख महिना लागेपछि शेयरबजारमा वृद्धि आउनु स्वाभाविक पनि मानिन्छ । आर्थिक वर्ष सकिन ३ महिना मात्र बाँकी रहने र आगामी वर्षको लाभांश अनुमान गर्न सकिने बेला भएको हुँदा सोही अनुमानको आधारमा बजारमा किनबेच हुनुलाई सामान्य मान्नुपर्छ ।
आज शेयर कित्ता, कारोबार संख्या र सूचक सबैमा वृद्धि आएको छ ।
लगानीकर्ताको चाप भने वाणिज्य बैंक समुहमा नै बढी परेको कारोबार भएका शेयर संख्याले देखाएको छ ।आज कारोबारमा आएका सबै समूहको सूचक बढेको छ ।
मर्जरको हल्लाले लगातार मूल्य बढिरहेको नेपाल कम्युनिटी डेभलपमेन्ट बैंकको शेयर मूल्यआज बढ्दै अघिल्लो दिनको बन्द मूल्य १ सय ३५ रुपैयाँमा रोकिएको छ ।
माउन्टेन हाइड्रोको आज पनि कारोबार हुन सकेन । नेपाल स्टक एक्सचेन्जले पहिलो कारोबार दायरा तोके पनि स्पेशल प्रि-ओपन सेसनमा यसको कारोबार हुन् नसकेको हुँदा निरन्तर सत्रमा कारोबार हुन सकेन । कम्पनीलाइ ९३ रुपैयाँ ७५ पैसादेखि २ सय ८१ रुपैयाँ २५ पैसासम्मको दायरा दिएको थियो ।
माउन्टेन हाइड्रोले पाँचथर जिल्लाको हेवा खोलामा २२ मेगावाटको आयोजना निर्माणको अन्तिम चरणमा पुर्याएको छ । काबेली करिडोर प्रसारण लाइन नबन्दा आयोजनाले व्यापारिक उत्पादन गर्न ढिलाई भएको छ ।
आज कारोबार मापन गर्ने सूचक २३ दशमलव ३३ अंकले बढेको छ ।
आजको बजार संक्षेप
कारोबार रकम
७४,२७,१८,७५१
शेयर संख्या
२४,११,६५०
कारोबार संख्या
८,९७८
कम्पनी संख्या
१७०
