काठमाडौं । महिला, बालबालिका तथा ज्येष्ठ नागरिक मन्त्री सीता बादीले पदमा रहँदा ‘नगर्ने’ १० वटा कामहरूको सूची सार्वजनिक गरेकी छन् ।
मन्त्री बादीले सामाजिक सञ्जालमार्फत आफ्नो कार्यकालमा नातागोता, सम्बन्ध वा चिनजानको आधारमा कसैलाई जागिर नलगाउने, नियुक्ति नदिने र स्वार्थप्रेरित सरुवा–बढुवा नगर्ने स्पष्ट पारेकी हुन् ।
शक्तिको दुरुपयोग नगर्ने र कानुन विपरीत कसैको भनसुन नसुन्ने पनि उनले प्रतिवद्धता व्यक्त गरेकी छन् । विशेष गरी लागूऔषध, ठगी, तस्करीजस्ता गम्भीर अपराधमा संलग्न कुनै पनि व्यक्तिलाई कानुनी कारबाहीबाट बचाउन वा संरक्षण गर्न आफ्नो तर्फबाट कुनै प्रयास नहुने उनले उल्लेख गरेकी छन् ।
भ्रष्टाचारविरुद्ध शून्य सहनशीलता अपनाउने बताउँदै मन्त्री बादीले कुनै पनि बहानामा कमिसन वा घुस नलिने र यस्ता गलत कार्य भएको जानकारी पाएमा त्यसका विरुद्ध सशक्त रूपमा उभिने प्रतिबद्धता जनाएकी छन्। महिला, दलित, बालबालिका, ज्येष्ठ नागरिक र सीमान्तीकृत समुदायमाथि हुने हिंसा र अन्यायका मुद्दामा आफूले कुनै सम्झौता नगर्ने उनको भनाइ छ ।
राज्यको स्रोत-साधनको दुरुपयोग नगर्ने घोषणा गर्दै उनले मन्त्रीको रूपमा पाइने अनावश्यक सुविधाहरू जस्तै क्वार्टर, घरभाडा र कूटनीतिक राहदानी समेत नलिने घोषणा गरेकी छन् ।
नागरिकका दुःख र अप्ठ्यारोमा सधैँ साथ दिने प्रण गर्दै मन्त्री बादीले भोट दिएको आधारमा कसैको दबाब वा प्रभावमा नपरी सबैलाई समान रूपमा सेवा गर्ने बताएकी छन् ।
