हेटौँडा । बागमती प्रदेश सरकारले दशौँ राष्ट्रिय खेलकुद प्रतियोगितामा पदक जित्ने आफ्ना खेलाडीलाई नगद पुरस्कार दिने निर्णय गरेको छ ।
प्रदेश खेलकुद विकास परिषद्को २६औँ विस्तारित बोर्ड बैठकले स्वर्ण पदक विजेतालाई १ लाख, रजत पदक विजेतालाई ७५ हजार र कांस्य पदक विजेतालाई ५० हजार रुपैयाँ पुरस्कार दिने निर्णय गरेको हो ।
आगामी मंसिर १६ देखि २९ गतेसम्म कर्णाली प्रदेशको सुर्खेतमा हुने प्रतियोगितामा बागमतीले २२ खेलमा सहभागिता जनाउने परिषद्ले जनाएको छ ।
प्रतियोगिताका लागि जिल्लास्तरबाट खेलाडी छनोट गरी बन्द प्रशिक्षणमा राखेर तयारी गराइनेछ ।
पदक विजेता खेलाडीलाई नगद पुरस्कार दिने निर्णयले प्रतियोगितामा सहभागी बागमतीका खेलाडीको मनोबल बढ्ने अपेक्षा गरिएको छ ।
