काठमाडौं । लगातारको अविरल वर्षासँगै देशका विभिन्न भू-भागमा आएको बाढी र पहिरोका कारण प्रमुख राजमार्ग तथा ग्रामीण सडक सञ्जालमा यातायात सेवा प्रभावित बनेको छ ।
नेपाल प्रहरीले आज बिहान सार्वजनिक गरेको विवरणअनुसार कोशी, बागमती, गण्डकी र कर्णाली प्रदेशका दर्जनौँ सडक खण्डहरूमा आंशिक अवरोध देखिएको छ भने केही स्थानमा पूर्ण रूपमा सवारी आवागमन बन्द गरिएको छ ।
कोशी प्रदेशमा भोजपुर र सङ्खुवासभा जिल्लाका सडक संरचनामा बाढी तथा पहिरोले असर पुर्याउँदा यातायातमा समस्या देखिएको छ ।
भोजपुर नगरपालिका–५ बोखिम क्षेत्रमा मध्यपहाडी लोकमार्ग बाढीको प्रभावमा परेपछि अहिले एकतर्फी रूपमा मात्र सवारी सञ्चालन भइरहेको प्रहरीले जनाएको छ ।
उक्त क्षेत्रमा वैकल्पिक मार्ग प्रयोगमा ल्याइएको भएपनि निरन्तर वर्षाका कारण थप जोखिम कायम रहेको बताइएको छ ।
त्यस्तै सङ्खुवासभाको मकालु गाउँपालिका–३ नयाँ बस्ती क्षेत्रमा गएको पहिरोले कोशी राजमार्ग अवरुद्ध बनाएको छ ।
हाल उक्त सडक खण्ड आंशिक रूपमा मात्र सञ्चालनमा रहेको र पहिरो हटाउने कार्य जारी रहेपनि ढुंगा तथा माटो खस्ने जोखिम अझै रहेको सुरक्षा निकायले जनाएको छ ।
बागमती प्रदेशमा पनि वर्षाले सडक यातायातमा उल्लेख्य असर पारेको छ ।
काभ्रेपलान्चोकको खुर्कोट–नेपालथोक–कटुञ्जेबेँसी सडक क्षेत्र आसपासमा बाढीको सम्भावना बढेपछि बीपी राजमार्गमा सवारी साधनको आवागमन पूर्ण रूपमा रोकिएको छ ।
सम्भावित दुर्घटना न्यूनीकरणका लागि सुरक्षाकर्मी परिचालन गरी जोखिमयुक्त स्थानमा निगरानी कडा पारिएको प्रहरीले जनाएको छ ।
गण्डकी प्रदेशका लमजुङ र म्याग्दी जिल्लामा सडक अवरुद्ध हुँदा स्थानीय आवागमन प्रभावित बनेको छ ।
लमजुङको मध्यनेपाल नगरपालिका–१० बिमिरेभञ्ज्याङ क्षेत्रमा गएको पहिरोले मध्यपहाडी लोकमार्ग पूर्ण रूपमा बन्द भएको छ ।
यस्तै म्याग्दीको अन्नपूर्ण गाउँपालिका–३ जलथले क्षेत्रमा पहिरो खस्दा बेनी–जोमसोम सडक खण्ड आंशिक रूपमा मात्र सञ्चालनमा रहेको छ ।
कर्णाली प्रदेशअन्तर्गत हुम्ला जिल्लामा पनि पहिरोको जोखिम बढेपछि यातायात सेवा प्रभावित बनेको छ ।
नाम्खा गाउँपालिका–२ क्षेत्रमा सम्भावित पहिरो जोखिमका कारण हिल्सा–सिमकोट सडक खण्डमा सवारी साधन सञ्चालन अस्थायी रूपमा रोकिएको प्रहरीले जनाएको छ ।
नेपाल प्रहरीले निरन्तर वर्षासँगै भू–स्खलन तथा बाढीको जोखिम अझै बढ्न सक्ने भन्दै सतर्क रहन आग्रह गरेको छ ।
सडक खुलाउने तथा अवरोध हटाउने कार्य जारी रहे पनि प्रतिकूल मौसमका कारण पूर्ण रूपमा यातायात सञ्चालनमा समय लाग्ने अनुमान गरिएको छ ।
साथै, अत्यावश्यक बाहेक लामो दूरीको यात्रा नगर्न तथा जोखिमयुक्त सडक प्रयोग नगर्न सर्वसाधारणलाई अनुरोध गरिएको छ ।
