काठमाडौं । नेपाली कांग्रेस संसदीय दलका नेता भीष्मराज आङ्देम्बेले पार्टीले ‘छाया मन्त्रिपरिषद्’ गठन नगरेको बताएका छन् । कांग्रेस संसदीय दलको विधानअनुसार १८ वटा मन्त्रालयलाई आधार मानेर विषयगत समिति संयोजकहरू तोकिएको भन्दै उनले त्यसलाई छाया सरकार भन्न नमिल्ने बताएका हुन् ।
आङ्देम्बेले प्रतिनिधि सभा र राष्ट्रिय सभाका सांसदहरूलाई समेटेर मन्त्रालयगत रूपमा जिम्मेवारी बाँडफाँट गरिएको र जसको उद्देश्य संसदीय कामलाई प्रभावकारी बनाउनु मात्र रहेको बताए । उनले सरकारको विकल्पका रूपमा समानान्तर संरचना खडा नगरिएको बताएका हुन् ।
उनले पहिले नेपाली राजनीतिमा ‘छाया सरकार’ भन्ने शब्दावली प्रयोग हुने गरेको भए पनि अहिले कांग्रेसले त्यस्तो संरचना नबनाएको बताएका हुन् । उनले भने, ‘हामीले बनाएको छाया सरकार होइन । संसदीय दलको विधानअनुसार विषयगत समिति संयोजक तोकिएको हो । पहिले छाया सरकार भन्थे, अहिले त्यस्तो होइन ।’ कांग्रेसले छाया सरकार बनाएको भनेर समाचारहरू सार्वजनिक भएका थिए ।
