काठमाडौं । नेपाली कांग्रेसभित्र देखिएको आन्तरिक मतभेद अन्त्य गर्दै पार्टीलाई एकताबद्ध बनाउने उद्देश्यसहित संस्थापन पक्षले इतर समूहसमक्ष सात बुँदे प्रस्ताव अघि सारेको खुलासा भएको छ। उपसभापति विश्वप्रकाश शर्मामार्फत जेठ १६ गते पठाइएको उक्त प्रस्तावमा अपेक्षित प्रतिक्रिया नआएपछि सार्वजनिक गरिएको हो।
प्रस्तावमा विशेष महाधिवेशनपछि उत्पन्न विवादलाई अन्त्य गर्दै आगामी १५औँ महाधिवेशनसम्म सहकार्यको वातावरण निर्माण गर्ने विषयलाई प्राथमिकता दिइएको छ।
प्रस्तावका मुख्य बुँदाहरू
१. विशेष महाधिवेशनको निर्णय स्वीकार गर्दै एकताबद्ध हुने
विशेष महाधिवेशन, निर्वाचन आयोगको अद्यावधिक र सर्वोच्च अदालतको निर्णयलाई स्वीकार गर्दै पार्टी एकताबद्ध भएर अघि बढ्ने।
असहमति राख्ने पक्षले भने आफ्नो मत १५औँ महाधिवेशनको बन्दसत्रमा प्रस्तुत गर्न सक्ने।
विशेष महाधिवेशनमा सहभागी भए वा नभएको आधारमा कुनै सदस्यमाथि विभेद नगर्ने।
२. क्रियाशील सदस्यता अद्यावधिक समयमै सम्पन्न गर्ने
महाधिवेशनको आधार मानिने क्रियाशील सदस्यता अद्यावधिक प्रक्रिया निर्धारित समयभित्र पूरा गर्ने।
सदस्यतासम्बन्धी विद्यमान अस्पष्टतालाई स्पष्ट बनाउने।
३. अग्रज नेताहरूलाई सम्मानजनक भूमिका दिने
लामो समय पार्टीमा योगदान पुर्याएका नेताहरूलाई केन्द्रीय समितिमा ‘वरिष्ठ नेता’को हैसियतमा सम्मानित भूमिका प्रदान गर्ने।
४. केन्द्रीय समितिमा समावेशी जिम्मेवारी बाँडफाँट
विभिन्न तहका इच्छुक नेताहरूलाई सम्मानजनक जिम्मेवारी दिने।
कार्यसम्पादन समितिमा समेत उचित सहभागिता सुनिश्चित गर्ने।
केन्द्रीय सदस्यहरू महाधिवेशन प्रतिनिधि बन्न वडा तहबाटै निर्वाचित हुनुपर्ने व्यवस्था लागू गर्ने।
५. महाधिवेशनसम्बन्धी समितिहरूमा साझा सहभागिता
निर्वाचन समिति, अनुशासन समिति तथा क्रियाशील सदस्यता व्यवस्थापन समितिमा सबै पक्षको सहभागिता सुनिश्चित गर्ने।
६. महाधिवेशन व्यवस्थापन समिति गठन गर्ने
केन्द्रीय समितिको अंगका रूपमा १५औँ महाधिवेशन व्यवस्थापन समिति गठन गरी तयारीलाई व्यवस्थित बनाउने।
७. भ्रातृ तथा शुभेच्छुक संस्थामा जिम्मेवारी दिने
इच्छुक नेताहरूलाई योग्यता र चाहनाअनुसार भ्रातृ तथा शुभेच्छुक संस्थाहरूमा नेतृत्व वा अन्य जिम्मेवारी प्रदान गर्ने।
सहमतिको खोजी अझै जारी
संस्थापन पक्षले अघि सारेका यी प्रस्तावहरू पार्टीभित्रको ध्रुवीकरण कम गर्दै आगामी महाधिवेशनलाई सहमतिपूर्ण बनाउने उद्देश्यले ल्याइएको बताइएको छ। यद्यपि इतर समूहबाट औपचारिक प्रतिक्रिया नआइसकेकाले कांग्रेसभित्रको आन्तरिक समीकरण अझै रोचक मोडमै रहेको राजनीतिक विश्लेषकहरूको बुझाइ छ।
