काठमाडौं। राष्ट्रपति रामचन्द्र पौडेलले संघीय संसद्बाट पारित भएका चार वटा महत्वपूर्ण विधेयकलाई प्रमाणीकरण गरेका छन्। राष्ट्रपति कार्यालयका अनुसार बिहीबार संविधानअनुसार ती विधेयकहरू प्रमाणीकरण गरिएको हो।
प्रमाणीकरण भएका विधेयकमा सार्वजनिक खरिद (दोस्रो संशोधन) विधेयक, २०८३, सम्पत्ति शुद्धीकरण (मनी लाउन्डरिङ) निवारण (तेस्रो संशोधन) विधेयक, २०८३, सहकारी (पहिलो संशोधन) विधेयक, २०८३ तथा स्वास्थ्य विज्ञान प्रतिष्ठानसम्बन्धी केही नेपाल ऐनलाई संशोधन गर्ने विधेयक, २०८३ रहेका छन्।
राष्ट्रपति कार्यालयका प्रवक्ता रितेशकुमार शाक्यले जारी गरेको विज्ञप्तिअनुसार संघीय संसद्को दुवै सदनबाट पारित भई प्रमाणीकरणका लागि पठाइएका यी विधेयकहरू बिहीबार नै राष्ट्रपति कार्यालय पुगेका थिए। संवैधानिक व्यवस्था अनुसार राष्ट्रपति पौडेलले सोही दिन प्रमाणीकरण गरेका हुन्।
प्रमाणीकरणसँगै ती विधेयकहरूले कानुनी मान्यता प्राप्त गरेका छन्। अब सम्बन्धित कानुनी प्रक्रिया पूरा भएपछि संशोधित व्यवस्था कार्यान्वयनमा आउनेछ।
