काठमाडौं। देशभर मनसुनी प्रणाली सक्रिय रहेकाले आज दिनभर अधिकांश क्षेत्रमा बदली रहने मौसमविद्ले बताएका छन्। मनसुनको न्यून चापीय रेखा पश्चिम नेपालमा औसतभन्दा केही माथि र पूर्वी क्षेत्रमा सामान्य अवस्थामै रहेकाले वर्षाको गतिविधि जारी रहने अनुमान गरिएको छ।
जल तथा मौसम विज्ञान विभागका अनुसार अहिले देशभर सामान्यदेखि पूर्ण बदली छ भने तराईका केही भागमा आंशिक बदली देखिएको छ। सुदूरपश्चिम प्रदेशका केही स्थानमा हल्का वर्षा भइरहेको छ।
दिउँसो हिमाली तथा पहाडी क्षेत्रका विभिन्न स्थानमा मेघगर्जन र चट्याङसहित मध्यम वर्षा हुने सम्भावना छ। बागमती, गण्डकी, लुम्बिनी र सुदूरपश्चिमका तराईका केही स्थान तथा मधेश र कोशी प्रदेशका सीमित क्षेत्रमा पनि वर्षा हुन सक्ने अनुमान गरिएको छ। गण्डकी, लुम्बिनी र कर्णाली प्रदेशका पहाडी क्षेत्रमा भने एक–दुई स्थानमा भारी वर्षा हुन सक्ने सम्भावना रहेको छ।
राति पनि देशका अधिकांश भू–भागमा बदली कायम रहनेछ। कोशी, बागमती र गण्डकीका पहाडी तथा हिमाली क्षेत्रका केही स्थानमा तथा लुम्बिनी, कर्णाली र सुदूरपश्चिमका पहाडी क्षेत्रमा मेघगर्जनसहित वर्षाको सम्भावना रहेको विभागले जनाएको छ। तराईका विभिन्न क्षेत्रमा पनि स्थानीय रूपमा वर्षा हुन सक्ने पूर्वानुमान छ।
विशेषगरी बागमती, गण्डकी, कोशी, कर्णाली र लुम्बिनीका केही पहाडी तथा हिमाली क्षेत्रमा भारी वर्षाको सम्भावना भएकाले नदी तथा खोलामा आकस्मिक बहाव, बाढी, पहिरो र भूक्षयको जोखिम बढ्न सक्ने चेतावनी दिइएको छ। सम्भावित जोखिमलाई ध्यानमा राख्दै आवश्यक सतर्कता अपनाउन तथा विभागका पछिल्ला मौसम सूचना नियमित रूपमा पछ्याउन सर्वसाधारणलाई आग्रह गरिएको छ।
