काठमाडौं । नेपाली कांग्रेसका नेता डा. प्रकाशशरण महतले पूर्वप्रधानमन्त्री एवं पार्टीका पूर्वसभापति शेरबहादुर देउवा नेपाल फर्किने क्रममा त्रिभुवन अन्तर्राष्ट्रिय विमानस्थलमा उपस्थित भएर स्वागत गर्न पार्टीका नेता तथा कार्यकर्तालाई आग्रह गरेका छन् ।
शनिबार काठमाडौंको बसुन्धारामा आयोजित नुवाकोट क्षेत्र नम्बर १ का अगुवा कार्यकर्ताको भेलालाई सम्बोधन गर्दै महतले देउवाको स्वागतमा विमानस्थलमा उल्लेख्य सहभागिता जनाउन आग्रह गरेका हुन् ।
उनका अनुसार देउवा २६ गते राति ९ः४५ बजे नेपाल आइपुग्ने कार्यक्रम तय भएको छ । यद्यपि, नेता–कार्यकर्तालाई सहज हुने गरी उनको आगमनको समय दिउँसो सार्न पहल भइरहेको महतले जानकारी दिए ।
महतले देउवाको स्वागतका लागि सबैलाई अनुकूल हुने समय मिलाउने प्रयास भइरहेको बताए ।
जेनजी आन्दोलनका क्रममा भएको आक्रमणमा परी घाइते भएका देउवा उपचारका लागि गत १३ फागुनको राति सिंगापुर गएका थिए । सिंगापुरमा उपचारपछि थप उपचारका लागि उनी ७ चैत २०८२ मा हङकङ पुगेका थिए ।
यसैबीच, कांग्रेसको संस्थापन इतर समूहले आगामी २९ साउनदेखि काठमाडौंमा राष्ट्रिय भेला आयोजना गर्ने तयारी गरेको छ । उक्त भेलालाई देउवाले सम्बोधन गर्ने कार्यक्रम तय गर्ने तयारी भइरहेको छ ।
राष्ट्रिय भेलाको व्यवस्थापन तथा तयारीका लागि संस्थापन इतर समूहले पूर्वमहामन्त्री डा. शशांक कोइरालाको संयोजकत्वमा मूल आयोजक समिति समेत गठन गरिसकेको छ ।
