काठमाडौं । भोटेकोशी नदीमा आएको बाढीले बगाएर ल्याएका ६२ वटा शव नवलपुरस्थित नारायणी नदीको किनारबाट फेला परेका छन् ।
जिल्ला प्रहरी कार्यालय नवलपरासी पूर्वका प्रहरी नायव उपरीक्षक अनिल पण्डितका अनुसार फेला परेका शवमध्ये २६ पुरुष, १६ महिला, ३ बालक र ७ बालिका छन् । थप ९ वटा शवको लिङ्ग पहिचान हुन नसकेको प्रहरीले जनाएको छ ।
प्रहरीका अनुसार अहिलेसम्म बरामद भएका कुनै पनि शवको पहिचान खुलेको छैन । पहिचानका लागि आवश्यक प्रक्रिया अघि बढाउने तयारी भइरहेको जनाइएको छ ।
फेला परेका शवलाई तत्कालका लागि सम्बन्धित पालिकाका अस्पतालमा सुरक्षित राखिएको छ । थप व्यवस्थापनका लागि ती शव पोखरा पठाउने तयारी भइरहेको प्रहरी नायव उपरीक्षक पण्डितले जानकारी दिए ।
बाढीपछि नारायणी नदी किनारमा शव भेटिने क्रम बढेपछि जिल्ला प्रहरी कार्यालयले बिहानैदेखि खोजी तथा संकलन कार्यलाई तीव्र बनाएको छ । शव खोज्न र संकलन गर्न प्रहरी टोलीलाई विभिन्न स्थानमा परिचालन गरिएको प्रहरीले जनाएको छ ।
