काठमाडौं । नुवाकोटको बाढी प्रभावित बेत्रावती क्षेत्रमा खोजी गर्ने क्रममा एउटै घरभित्रबाट २४ जनाको शव फेला परेको छ।
विदुर नगरपालिका–१० मा पर्ने बेत्रावतीस्थित उक्त घरबाट सोमबार २४ शव निकालिएको जिल्ला प्रहरी कार्यालय नुवाकोटका प्रहरी उपरीक्षक (एसपी) विपिन रेग्मीले जानकारी दिए।
प्रहरीका अनुसार घरभित्र खोजी कार्य अझै पूरा भएको छैन। मंगलबार पनि उक्त स्थानमा थप खोजी गरिने तयारी छ।
एसपी रेग्मीले एकै स्थानमा यति ठूलो संख्यामा शव भेटिनुको कारण र घरको वास्तविक पहिचानबारे अनुसन्धान भइरहेको बताए। प्रारम्भिक रूपमा घर होटल वा गेस्टहाउसजस्तो देखिए पनि त्यसबारे यकिन हुन नसकेको उनको भनाइ छ।
‘घरधनी को हुन् भन्ने खुल्न सकेको छैन। सम्बन्धित वडाध्यक्षसँग पनि सम्पर्क हुन सकेको छैन। होटल वा गेस्टहाउस हुन सक्ने देखिए पनि अहिले नै पुष्टि गर्न सकिने अवस्था छैन,’ उनले भने।
भदौ १० गते रसुवाको भोटेकोशी हुँदै आएको बाढीले नुवाकोटसहित आसपासका क्षेत्रमा ठूलो जनधनको क्षति पुर्याएको छ। सोमबारसम्म ९ सयभन्दा बढी शव फेला परिसकेको जनाइएको छ भने ठूलो संख्यामा मानिस अझै सम्पर्कविहीन छन्।
बाढी प्रभावित क्षेत्रमा बेपत्ताको खोजी र उद्धारका लागि नेपाल प्रहरी, सशस्त्र प्रहरी बल र नेपाली सेनाका टोली परिचालन भएका छन्। तीनवटै सुरक्षा निकायले खोज तथा उद्धार कार्यलाई निरन्तरता दिइरहेका छन्।
