काठमाडौं । देशभर अहिले मनसुनी प्रणाली सक्रिय रहेको छ । मौसम पूर्वानुमान महाशाखाका अनुसार मनसुनको न्यून चापीय रेखा पश्चिमतर्फ सामान्य अवस्थाभन्दा केही उत्तर र पूर्वतर्फ सरदर स्थान आसपास रहेको छ ।
हाल कोशी प्रदेशको तराई तथा मधेश प्रदेशमा आंशिक बदली देखिएको छ भने अन्य अधिकांश क्षेत्रमा मौसम सामान्यदेखि पूर्ण बदली रहेको छ । बागमतीका केही स्थानसहित कोशी, गण्डकी, लुम्बिनी, कर्णाली र सुदूरपश्चिमका थोरै स्थानमा मध्यम वर्षा भइरहेको महाशाखाले जनाएको छ ।
आज दिउँसो देशभर मौसम सामान्यतया बदली रहनेछ । हिमाली तथा पहाडी क्षेत्रमा केही स्थानमा मेघगर्जन र चट्याङसहित मध्यम वर्षा तथा हिमपात हुन सक्ने पूर्वानुमान गरिएको छ ।
तराईतर्फ पनि वर्षाको सम्भावना रहेको छ । कोशी र सुदूरपश्चिमका केही तराई क्षेत्रमा तथा मधेश, बागमती, गण्डकी र लुम्बिनीका थोरै स्थानमा मेघगर्जन र चट्याङसहित मध्यम वर्षा हुन सक्नेछ । मधेश र लुम्बिनीका तराई क्षेत्रमा केही स्थानमा हावाहुरी चल्न सक्ने सम्भावना समेत रहेको छ ।
यसैगरी, कोशी, बागमती र गण्डकीका हिमाली तथा पहाडी भूभागका साथै लुम्बिनी, कर्णाली र सुदूरपश्चिमका पहाडी क्षेत्रमा एक–दुई स्थानमा भारी वर्षा हुन सक्ने महाशाखाको अनुमान छ ।
रातिको समयमा पनि देशभर सामान्यतया बदली रहनेछ । कोशी, बागमती र गण्डकीका हिमाली तथा पहाडी क्षेत्रमा केही स्थानमा र लुम्बिनी, कर्णाली तथा सुदूरपश्चिमका हिमाली–पहाडी क्षेत्रमा थोरै स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ ।
राति कोशीको तराईका केही स्थान, मधेश, बागमती र गण्डकीका तराईका थोरै स्थान तथा लुम्बिनी र सुदूरपश्चिमका तराईका एक–दुई स्थानमा पनि मध्यम वर्षा हुन सक्नेछ ।
राति कोशी प्रदेश तथा बागमती र गण्डकीका हिमाली भूभागका एक–दुई स्थानमा भारी वर्षाको सम्भावना रहेकाले सम्बन्धित क्षेत्रका नागरिकलाई आवश्यक सतर्कता अपनाउन मौसमविद्ले सुझाव दिएका छन् ।
