काठमाडौँ / अमेरिकी राष्ट्रपति Donald Trump ले इरानसँग जारी तनाव अन्त्य गर्न तयार गरिएको प्रारम्भिक सम्झौता अन्तिम चरणमा पुगेको बताएका छन्। आइतबार सार्वजनिक अभिव्यक्तिमा उनले अमेरिका, इरान तथा मध्यस्थकर्ताको भूमिकामा रहेका राष्ट्रहरूबीच अधिकांश विषयमा सहमति जुटिसकेको उल्लेख गरेका हुन्।
ट्रम्पका अनुसार अब सम्झौताका केही प्राविधिक र अन्तिम विवरण टुंग्याउने काम मात्र बाँकी रहेको छ। उनले छिट्टै औपचारिक घोषणा सार्वजनिक गरिने संकेत पनि दिएका छन्।
युद्धविरामको प्रयास तीव्र भइरहेका बेला Asim Munir तेहरान पुगेका थिए। उनले इरानका राजनीतिक तथा सैन्य नेतृत्वसँग भेटवार्ता गर्दै सम्भावित सहमतिको वातावरण बनाउन पहल गरेको अन्तर्राष्ट्रिय सञ्चारमाध्यमहरूले जनाएका छन्।
प्रस्तावित सहमतिअनुसार अमेरिका र इरानबीच प्रारम्भिक रूपमा ३० दिनको वार्ता अवधि तय गरिनेछ। आवश्यकता अनुसार उक्त अवधि थप एक महिनासम्म लम्ब्याउन सकिने व्यवस्था समेत राखिएको बताइएको छ।
यस्तै, सम्झौताको मुख्य अंशमा इरानले उच्च स्तरमा प्रशोधित युरेनियम भण्डारण घटाउने वा त्याग्ने विषयमा प्रारम्भिक सहमति जनाएको खबर पनि सार्वजनिक भएको छ। यसलाई मध्यपूर्व क्षेत्रमा बढ्दो तनाव कम गर्ने दिशामा महत्वपूर्ण प्रगतिका रूपमा हेरिएको छ।
