काठमाडौँ । रुसले सोमबार राति युक्रेनका विभिन्न सहरलाई लक्षित गर्दै व्यापक हवाई आक्रमण गरेको छ। आक्रमणमा परी हालसम्म कम्तीमा पाँच जनाको ज्यान गएको तथा ४५ जना घाइते भएको अन्तर्राष्ट्रिय सञ्चारमाध्यमहरूले जनाएका छन्।
युक्रेनको डिनिप्रो सहरमा भएको आक्रमणमा चार जनाको मृत्यु भएको छ भने १६ जना घाइते भएका छन्। त्यसैगरी राजधानी किएभमा एक जनाले ज्यान गुमाएका छन् भने २९ जना घाइते भएका छन्।
स्थानीय अधिकारीहरूका अनुसार आक्रमणका कारण आवासीय भवन तथा अन्य संरचनामा समेत क्षति पुगेको छ। घाइतेहरूको विभिन्न अस्पतालमा उपचार भइरहेको बताइएको छ।
किएभका मेयर भिटाली क्लिट्स्कोले नागरिकहरूलाई सुरक्षित आश्रयस्थलमा बस्न आग्रह गरेका छन्। यस्तै, किएभ सैन्य प्रशासनका प्रमुख तैमुर तकाचेन्कोले रुसले ब्यालिस्टिक मिसाइल प्रयोग गरेर आक्रमण गरिरहेको बताएका छन्।
गत महिना युक्रेनले रुसको नियन्त्रणमा रहेको क्षेत्रमा ड्रोन आक्रमण गरेपछि मस्कोले प्रतिआक्रमणलाई तीव्र बनाउने चेतावनी दिएको थियो। पछिल्लो हमला सोही चेतावनीको निरन्तरताका रूपमा हेरिएको छ।
रुस–युक्रेन युद्ध जारी रहँदा दुवै पक्षबाट आक्रमण र प्रतिआक्रमणका घटनाहरू बढिरहेका छन्, जसका कारण सर्वसाधारण नागरिकहरू थप जोखिममा परिरहेका छन्।
