काठमाडौं । नेपाल कम्युनिस्ट आन्दोलनका प्रमुख वैचारिक अगुवा तथा नेपाल कम्युनिस्ट पार्टी (नेकपा)का संस्थापक महासचिव पुष्पलाल श्रेष्ठको ४८औँ स्मृति दिवस बिहीबार देशभर विभिन्न कार्यक्रमका साथ मनाइँदैछ।
नेकपा (एमाले), नेपाल कम्युनिस्ट पार्टीसहित विभिन्न वामपन्थी दल तथा संगठनहरूले पुष्पलालप्रति श्रद्धाञ्जली अर्पण गर्दै विचार गोष्ठी, स्मरणसभा र अन्य कार्यक्रम आयोजना गरेका छन्।
वि.सं. १९८१ असार १५ गते रामेछापमा जन्मिएका पुष्पलाल नेपाली कम्युनिस्ट आन्दोलनका प्रारम्भिक नेतृत्वकर्ता मानिन्छन्। उनी सहिद गंगालाल श्रेष्ठका भाइ समेत हुन्। राजनीतिक गतिविधिका क्रममा उनले लामो समय प्रवासबाट पार्टी निर्माण र संगठन विस्तारमा सक्रिय भूमिका निर्वाह गरेका थिए।
पुष्पलालले कार्ल मार्क्स र फ्रेडरिक एङ्गेल्सद्वारा लिखित कम्युनिस्ट मेनिफेस्टो नेपाली भाषामा पहिलोपटक अनुवाद गरेका थिए। साथै, नेपाली समाजको वर्गीय संरचना र राजनीतिक परिवर्तनका विषयमा उनले विभिन्न लेख तथा कृतिमार्फत वैचारिक योगदान दिएका थिए।
वि.सं. २००६ वैशाखमा निरञ्जनगोविन्द वैद्य, नारायणविलास जोशी, नरबहादुर कर्माचार्य र मोतीदेवी शाक्यसँग मिलेर भारतको कोलकातामा नेपाल कम्युनिस्ट पार्टी स्थापना गरिएको इतिहास छ। त्यसअघि उनले अन्य प्रजातान्त्रिक नेतासँग मिलेर राजनीतिक संगठन निर्माणमा पनि सक्रिय भूमिका खेलेका थिए।
पुष्पलालले पञ्चायती व्यवस्थाविरुद्ध प्रजातान्त्रिक शक्तिहरूबीच सहकार्य आवश्यक रहेको धारणा राख्दै संयुक्त आन्दोलनको पक्षमा निरन्तर वकालत गरेका थिए। उपचारका क्रममा वि.सं. २०३५ साउन ७ गते भारतको नयाँदिल्लीमा उनको निधन भएको थियो।
स्मृति दिवसको अवसरमा नेकपा (एमाले)को राजधानी प्रदेश कमिटीसहित विभिन्न कम्युनिस्ट दलहरूले आज विशेष कार्यक्रम आयोजना गरी पुष्पलालको योगदानको स्मरण गरेका छन्।
