काठमाडौं । तिब्बती भूभागबाट भोटेकोशी नदीमा आएको ठूलो बाढीका कारण तल्लो तटीय क्षेत्रमा क्षतिको अवस्था देखिएपछि सभामुख डीपी अर्यालले घटनाप्रति गम्भीर चासो व्यक्त गरेका छन्।
सामाजिक सञ्जालमार्फत आफ्नो धारणा सार्वजनिक गर्दै अर्यालले रसुवा, नुवाकोट, धादिङ, चितवनलगायत नदी तटीय क्षेत्रमा रहेका नागरिकलाई विशेष सावधानी अपनाउन आग्रह गरेका छन्। जोखिमयुक्त स्थानमा रहेका नागरिकलाई सम्भावित खतरा बढ्नुअघि नै सुरक्षित स्थानमा जान उनले अनुरोध गरेका हुन्।
बाढी प्रभावित क्षेत्रमा उद्धार तथा राहतका कामलाई प्रभावकारी बनाउन तीनै तहका सरकारबीच तत्काल समन्वय आवश्यक रहेको सभामुख अर्यालको भनाइ छ। उनले संघीय सरकार, प्रदेश सरकार र सम्बन्धित स्थानीय तहलाई प्रभावित क्षेत्रमा आवश्यक जनशक्ति, राहत सामग्री तथा अन्य सहयोग शीघ्र परिचालन गर्न आग्रह गरेका छन्।
बाढीको जोखिम बढिरहेको अवस्थामा सरकारी निकायसँगै स्थानीय समुदाय र सरोकारवाला सबै पक्षको सक्रियता आवश्यक रहेको उनले बताएका छन्। सम्भावित मानवीय क्षति कम गर्न समयमै सूचना आदानप्रदान, सतर्कता र समन्वयलाई प्राथमिकता दिनुपर्नेमा अर्यालले जोड दिएका छन्।
उनले विपद्को समयमा प्रभावित नागरिकको उद्धारलाई पहिलो प्राथमिकतामा राख्दै आवश्यक सहयोगका लागि सबै पक्ष एकजुट हुन आग्रह गरेका छन्। कठिन परिस्थितिमा सामूहिक प्रयास र सावधानी अपनाउन सके क्षति न्यूनीकरणमा सहयोग पुग्ने उनको भनाइ छ।
