काठमाडौँ । नवनियुक्त सञ्चार तथा सूचना मन्त्री जगदीश खरेलले मन्त्रालयले तयार पारेको निर्णयमा हस्ताक्षर गर्न मानेनन् । मन्त्रालयले तयार पारेको काठमाडौँ उपत्यकाका सार्वजनिक स्थलमा निःशुल्क वाईफाइ सेवा उपलब्ध गराउने प्रस्ताव ल्याएको थियो ।
सोमबार पद तथा गोपनीयताको शपथलगत्तै मन्त्रालय पुगेर पदबहाली गरेपछि मन्त्री खरेलले पहिलो निर्णयका रूपमा २ महिनाभित्र काठमाडौँका सार्वजनिक स्थानहरूमा यो सेवा उपलब्ध गराउने प्रस्ताव मन्त्रालयका अधिकारीले ल्याएका थिए ।
मन्त्री खरेलले मन्त्रालयले तयार पारेको उक्त प्रस्तावमा परिमार्जन गर्दै आगामी ५ महिनाभित्र सातै प्रदेशका प्रमुख सहरका मुख्य स्थानमा पनि वाइफाई विस्तार गर्ने प्रस्ताव गर्न निर्देशन दिएका छन् । तर केहीबेरपछि निर्णय सच्याएर ल्याएपछि मन्त्री खरेलले निर्णयमा हस्ताक्षर गरेका छन् ।
